រាជធានីភ្នំពេញ ៖
អគ្គិភ័យបានឆាបឆេះឃ្លាំងអេតចាយ មួយកន្លែងយ៉ាងសន្ធោសន្ធៅ បង្កឲ្យមានការភ្ញាក់ផ្អើលដល់ប្រជាពលរដ្ឋ និងសមត្ថកិច្ចហៅរថយន្តពន្លត់អគ្គិភ័យចេញជួយអន្តរាគមន៍បាញ់ទឹកពន្លត់ ។ ហេតុការណ៍នេះបានកើតឡើងនៅវេលាម៉ោង ៤និង៥០នាទីល្ងាច ថ្ងៃទី២៤ ខែមករា ឆ្នាំ២០២៤ ដែលស្ថិតនៅចំណុចឃ្លាំងអេតចាយ ផ្លូវ២១៧ ភូមិម័ល សង្កាត់ដង្កោ ខណ្ឌដង្កោ រាជធានីភ្នំពេញ។
លោកវរសេនីយ៍ឯក ព្រហ្ម យ៉ន នាយការិយាល័យនគរបាលបង្ការពន្លត់អគ្គិភ័យ និងសង្គ្រោះ នៃស្នងការដ្ឋាននគរបាលរាជធានីភ្នំពេញ បានឲ្យដឹងថា ក្រោយពីទទួលបានព័ត៏មានពីប្រជាពលរដ្ឋរាយការណ៍តាមរយៈលេខទូរស័ព្ទ 666 ថា មានករណីអគ្គិភ័យកំពុងឆាបឆេះឃ្លាំងអេតចាយ មួយកន្លែងនៅខណ្ឌដង្កោ ភ្លាមៗនោះ លោកវរសេនីយ៍ឯក ព្រហ្ម យ៉ន ក៏បានបញ្ជាទៅរថយន្តពន្លត់អគ្គិភ័យដែលនៅក្បែរទីតាំងកើតហេតុខាងលើ ធ្វើការចេញជួយអន្តរាគមន៍ ដើម្បីបាញ់ទឹកទប់ស្កាត់មិនឲ្យរាលដាលដល់ផ្ទះប្រជាពលរដ្ឋក្បែរខាងទៀត។
លោកវរសេនីយ៍ឯក ព្រហ្ម យ៉ន នាយការិយាល័យនគរបាលបង្ការពន្លត់អគ្គិភ័យ និងសង្គ្រោះ បានបន្តថា ចំពោះកិច្ចប្រតិបត្តិការខាងលើនេះ កម្លាំងជំនាញបានប្រើប្រាស់រថយន្តពន្លត់អគ្គិភ័យរបស់ស្នងការដ្ឋាននគរបាលរាជធានីភ្នំពេញ ចំនួន០២គ្រឿង ប្រើប្រាស់ទឹកអស់០២ឡាន ស្មើរនឹង០៨ម៉ែត្រគូប, រថយន្តជំនួយមកពីក្រុមហ៊ុនស្រាបៀរកម្ពុជា ចំនួន០១គ្រឿង ប្រើប្រាស់ទឹកអស់០១ឡាន ស្មើរនឹង០៦ម៉ែត្រគូប ។ លោកវរសេនីយ៍ឯក ព្រហ្ម យ៉ន នាយការិយាល័យនគរបាលបង្ការពន្លត់អគ្គិភ័យ និងសង្គ្រោះ បានបន្តទៀតថា ចំពោះប្រភេទសំណង់ខាងលើនេះ គឺជា ថ្មប្រក់ស័ង្កសី ទំហំ (៥០ម៉ែត្រ x ៦០ម៉ែត្រ) ក្នុងនោះបណ្តាលឲ្យឆេះឃ្លាំង ទំហំ (១០ម៉ែត្រ x ១០ម៉ែត្រ) ចំនួន០១ឃ្លាំង រួមមានម៉ាស៊ីនគ្រីបកំប៉ុងអេតចាយចំនួន០១គ្រឿង និងសម្ភារៈអេតចាយអស់មួយចំនួន និងពុំបានឆេះរាលដាលដល់ផ្ទះអ្នកជិតខាងឡើយ។
ដោយឡែក ករណីខាងលើ ត្រូវបានសមត្ថកិច្ចជំនាញរបស់យើង ធ្វើការគ្រប់គ្រងបានទាំងស្រុងនៅម៉ោង ៥និង១០នាទីល្ងាចនាថ្ងៃខែឆ្នាំដដែល ដោយនៅក្នុងនោះ បណ្តាលឲ្យមនុស្សប្រុសម្នាក់រងរបួសស្រាល ចំពោះមូលហេតុដែលបណ្តាលឲ្យមានគ្រោះអគ្គិភ័យនេះ បណ្តាលមកពីការផ្ទុះកំប៉ុងហ្គាសបង្កជាអគ្គិភ័យ៕
.jpg?1706161235)
.jpg?1706161236)
.jpg?1706161237)
.jpg)
.jpg)
