អភិបាលរងខេត្តកំពង់ចាម ចុះសំណេះសំណាលជាមួយកម្មករកម្មការនី កំពុងធ្វើចត្តាឡីស័ក

 កំពង់ចាម៖

ឯកឧត្តម កែវ នាឬទ្ធិ អភិបាលរងខេត្ត តំណាង ឯកឧត្តម អ៊ុន ចាន់ដា អភិបាល នៃគណៈអភិបាលខេត្ត និងជាប្រធានគណៈកម្មការខេត្ត យុទ្ធប្រឆាំងនឹងជំងឺកូវីដ ១៩ ថ្ងៃទី០៩ ខែមិថុនា ឆ្នាំ ២០២១ បានអញ្ជើញជួបសំណេះសំណាលជាមួយកម្មករកម្មការនី កំពុងធ្វើចត្តាឡីស័ក នៅមណ្ឌលចត្តាឡីស័ក សម្តេចជួនណាត និងចុះពិនិត្យសកម្មភាព របស់មន្ត្រីជំនាញ នៃមន្ទីរសុខាភិបាលខេត្តកំពង់ចាម ដែលបានយកសំណាកបងប្អូនកម្មករ កម្មការនីរោងចក្រមេតថេត កំពុងធ្វើចត្តាឡីស័កនៅមណ្ឌលចត្តាឡីស័ក សម្តេចជួនណាត និងបងប្អូនប្រជាពលរដ្ឋដែលប៉ះពាល់ផ្ទាល់ជាមួយកើតជំងឺកូវីដ-១៩ ។ 

លោក ប៊ិន ឡាដា អភិបាល នៃគណៈអភិបាល ស្រុកកំពង់សៀម បានឲ្យដឹងថា មន្ត្រីជំនាញរបស់មន្ទីរសុខាភិបាល ខេត្តកំពង់ចាម បានយកសំណាកបងប្អូនកម្មករ កម្មការនី រោងចក្រមេតថេក ដែលកំពុងធ្វើចត្តាឡីស័ក នៅមណ្ឌលចត្តាឡីស័ក សម្តេចជួនណាត និងបងប្អូនប្រជាពលរដ្ឋ ដែលប៉ះពាល់ផ្ទាល់ ជាមួយកើតជំងឺកូវីដ-១៩ មានដូចខាងក្រោម៖១. បានយកសំណាកលើកទី២ លើបងប្អូនកម្មករ កម្មការកម្មការនីរោចចក្រមេតថេត ចំនួន ៧៩នាក់ ស្រី ៧៩នាក់ ជាលទ្ធផល រកឃើញអវិជ្ជមានជំងឺកូវីដ-១៩  ទាំង ៧៩នាក់ ហើយទាំង ៧៩នាក់ ត្រូវក្រុមគ្រូពេទ្យបានអនុញ្ញាតឲ្យត្រឡប់ទៅផ្ទះវិញ ដោយភ្ចាប់ជាមួយលិខិតបញ្ជាក់ការធ្វើចត្តាឡីស័ក និងប៉ៅអ៊ី ដែលជាអំណោយ ឯកឧត្តម វេង សាខុន វរដ្ឋមន្រ្តីក្រសួង កសិកម្មរុក្ខាប្រមាញ់ និងនេសាទ និងជាប្រធានក្រុមការងាររាជរដ្ឋាភិបាល ចុះជួយស្រុកកំពង់សៀម ។២. បានយកសំណាកលើកទី១ លើបងប្អូនប្រជាពលរដ្ឋមកពីឃុំវិហារធំ, ទ្រាន , ស្រក , រំចេក , គគរ , និងឃុំកោះរកា ២៧នាក់ដែលប៉ះពាល់ផ្ទាល់ជាមួយអ្នកកើតជំងឺកូវីដ-១៩ ដោយឧបករណ៍តេស្តរហ័សរកវីរុសកូវីដ-១៩។ ជាលទ្ធផល  រកឃើញអវិជ្ជមានជំងឺកូវីដ-១៩  ទាំង ២៧នាក់។ សរុបការយកសំណាក គឺចំនួន ១០៦នាក់ ជាលទ្ធផល រកឃើញអវិជ្ជមានជំងឺកូវីដ-១៩ ទាំងអស់ ។លោកអភិបាលស្រុក បានឲ្យដឹងទៀតថា ជាមួយគ្នានោះដែរ ឯកឧត្តម កែវ នាឬទ្ធិ អភិបាលរង នៃគណៈអភិបាលខេត្ត បានផ្តល់ម៉ាស់ចំនួន៥០០០ម៉ាស់ ឧបត្ថម្ភដល់ មណ្ឌលចត្តាឡីស័ក សម្តេចជួនណាត ដែលជាអំណោយ  ឯកឧត្តម អ៊ុន ចាន់ដា អភិបាល នៃគណៈអភិបាលខេត្តកំពង់ចាមផងដែរ ៕