ក្រុមហ៊ុន ខេ ស៊ី ស៊ី វី ផ្លេនថេសិនបានចុះកិច្ចសន្យាទិញ-លក់ ផលិតផលកសិកម្ម ជាមួយតំណាងក្រុមផលិត 0៧ក្រុម

មន្ទីរពាណិជ្ជកម្ម ខេត្តកំពង់ចាម កាលពីថ្ងៃទី២៣ ខែឧសភា ឆ្នាំ២០២១ កន្លងទៅ គម្រោងជំរុញទីផ្សារ សម្រាប់កសិកម្មខ្នាតតូច បានសម្រួលសម្រួលកិច្ចសន្យាទិញ-លក់ រវាងក្រុមហ៊ុន ខេ ស៊ី ស៊ី វី ផ្លេនថេសិន (K.C.C.V.Plantation. Co,Ltd) និងតំណាងក្រុមផលិត ចំនួន ០៧ក្រុម មានក្រុមផលិតបន្លែ មាន់ស្រែ អង្ករ និងផ្លែឈើ ជាដើម ។បើតាមមន្ត្រី នៃមន្ទីរពាណិជ្ជកម្ម ខេត្តកំពង់ចាម បានឲ្យដឹងថា ក្រុមហ៊ុន ខេ ស៊ី ស៊ី វី ផ្លេនថេសិន និងតំណាងក្រុមផលិតទាំង ០៧ក្រុម បានឯកភាពលើលក្ខខ័ណ្ឌ នៃការទិញ-លក់ និងយល់ព្រម ធ្វើកិច្ចសន្យាទិញ-លក់ ជាមួយគ្នារយៈពេល ៦ខែ ជាជំហានទី១ ដោយចាប់ផ្តើមពីថ្ងៃទី២៣ ខែឧសភា ឆ្នាំ២០២១ រហូតដល់ខែវិច្ឆិកា ឆ្នាំ២០២១ ។ 

មន្ត្រីដដែល បានឲ្យដឹងទៀតថា តំណាងក្រុមផលិត បានសម្តែងក្តីសប្បាយរីករាយ ដោយក្រុមកសិករ មានអ្នកទទួលទិញក្នុងបរិមាណមួយច្បាស់លាស់ ព្រមខិតខំបង្កើនផលិតភាព កសិកម្ម និងគុណភាពតាមផែនការជូនដល់អ្នកទទួលទិញ ។ ទន្ទឹមនឹងនោះដែរ តំណាងក្រុមហ៊ុន ខេ ស៊ី ស៊ី វី ផ្លេនថេសិន ក៏មានក្តីសប្បាយរីកដែរ និងជឿទុកចិត្តក្រោមការសម្របសម្រួល របស់មន្ទីរពាណិជ្ជកម្មខេត្ត និងសន្យាថា នឹងអនុវត្តជាមួយក្រុមកសិករ ដោយការទទួលខុសត្រូវខ្ពស់ ព្រមទាំង រំពឹងទុកថា អាចនឹងពង្រីកការបញ្ជាទិញ នៅជំហានទី២ បន្តទៀត ។

 ជាមួយគ្នានោះដែរ មន្ទីរពាណិជ្ជកម្មខេត្តកំពង់ចាម បានសំណូមសូមឲ្យភាគីទាំង២ អនុវត្តកិច្ចសន្យាទិញ-លក់ ប្រកបដោយស្មារតីទទួលខុសត្រូវ និងយោគយល់គ្នា ដោយឈរលើស្មារតីទទួលបានអត្ថប្រយោជន៍រៀងៗខ្លួន និងយូរអង្វែង ផងដែរ ។ មន្ត្រីរូបនោះ ក៏បានបញ្ជាក់ដែរថា គិតមកដល់បច្ចុប្បន្ន ក្រោមការសម្របសម្រួល របស់គម្រោងជំរុញទីផ្សារសម្រាប់កសិកម្មខ្នាត មន្ទីរពាណិជ្ជកម្មខេត្តកំពង់ចាម សម្រេចបានជាកិច្ចសន្យាទិញលក់ជូនកសិករសរុប ៧៧កិច្ចសន្យា ដែលមានផលិតផល ស្រូវ បន្លែ មាន់ស្រែ និងដំឡូងមី ៕