ជាក់ស្តែងក្រុមទាំង៣សុទ្ធតែមានកម្រិតសមត្ថភាពប្រកួតប្រជែងលើកម្ពុជាក៏មែនពិត ប៉ុន្តែត្រូវចាំថាក្រុមជម្រើសជាតិកម្ពុជាអាយុក្រោម១៩ឆ្នាំបានឆ្លងមកដល់ជុំចុងក្រោយនេះក៏មិនធម្មតាដែរដោយយើងបានប្រកួតឈ្នះ៤ប្រកួត និងចាញ់ត្រឹមតែ១ប្រកួតប៉ុណ្ណោះក្នុងវគ្គជម្រុះដែលធ្វើឡើងនៅប្រទេសកម្ពុជាយើងផ្ទាល់តែម្តងកាលពីអំឡុងវិច្ឆកាឆ្នាំ២០១៩។ ដោយកាលនោះយើងចាញ់ម៉ាឡេស៊ី ៤-៥ ក្រោយមកទៀតឈ្នះកោះម៉ារីយ៉ាណាយ៉ាងចាស់ដៃដោយលទ្ធផល ៩-០, មុនទៅយកឈ្នះថៃ ២-១ និងបន្តយកឈ្នះប្រ៊ុយណេ ៣-០ ទៀត។ ហើយកាលនោះកីឡាករដែលឡើងជើងខ្លាំងក្នុងទីលានគឺ សៀង ចន្ធា ដែលបច្ចុប្បន្នកំពុងលេងនៅ ឯក្លិបបឹងកេតឯណោះ។
ក៏សូមបញ្ជាក់ផងដែរថា ការខិតខំប្រឹងប្រែងដុសខាតថ្នាលយុវជនរបស់សហព័ន្ធកីឡាបាល់ទាត់កម្ពុជាបានចេញផ្លែផ្កាមកជាបណ្តើរៗហើយដោយលទ្ធផលដែលយុវជនយើងសម្រេចបាននាប៉ុន្មានឆ្នាំចុងក្រោយមានភាពល្អប្រសើរច្រើនបើប្រៀបនឹងឆ្នាំមុនៗ ពិសេសយុវជនអាយុក្រោម២២ឆ្នាំយើងបានទៅធ្វើព្យុះធ្វើភ្លៀងនៅកីឡាស៊ីហ្គេមលើកទី៣០ នាប្រទេសហ្វីលីពីនកាលពីចុងឆ្នាំ២០១៩ កន្លងទៅនេះផង។
