ប្រជាពលរដ្ឋជាច្រើនគ្រួសារ រស់នៅភូមិកំពង់សំណាញ់ ឃុំមៀន ស្រុកព្រៃឈរ ភាគច្រើនជាប្រជានេសាទ បន្ទាប់របរមួយនេះពួកគាត់នាំគ្នាដកព្រលឹតលក់បន្ថែមទៀត ដើម្បីបង្កើនប្រាក់ចំណូលបន្ថែមសម្រាប់ទ្រទ្រង់ជីវភាពឲ្យកាន់តល្អប្រសើរឡើងមួយកំរិតទៀត។ អ្នកភូមិកំពុងសំណាញ់ ស្ថិតក្នុង ឃុំមៀន ស្រុកព្រៃឈរ គ្រួសារភាគច្រើនជាអ្នកប្រជានេសាទ និងធ្វើស្រែចំការ ដើម្បីផ្គត់ផ្គង់ជីវភាពគ្រួសារ ខណៈតំបន់នេះជាវាលទំនាប និងទទួលរងគ្រោះទឹកជំនន់ជន់លិចជារៀងរាល់ឆ្នាំ ។
ពលរដ្ឋក្រៅពីប្រកបរបរនេសាទ និងធ្វើស្រែចំការ ពួកគេឆ្លៀតពេលនាំគ្នា ដកព្រលឹត យកមកលក់ បន្ថែមទៀត ដើម្បីជួយសម្រួលនូវជីវភាពគ្រួសារ បានមួយចំណែកទៀតផង។ ប្រជាពលរដ្ឋបានប្រាប់ឲ្យដឹងថា ដំណាំព្រលឹតនេះ គឺដុះក្នុងបឹងធំ ដែលពលរដ្ឋត្រូវធ្វើដំណើរតាមទូកម៉ាស៉ីនទៅដកដោយប្រើប្រាស់ពេលជិតមួយម៉ោង ទើបដល់កន្លែងដកព្រលឹត។ពលរដ្ឋបានបញ្ជាក់បន្ថែមទៀតថា ព្រលឹតពេលដករួចត្រូវយកមកវេចខ្ជប់ដាក់ថង់ ដោយក្នុងមួយថង់លក់ចេញចាប់ពី៥០០០រៀលទៅ៦០០០រៀល តាមទីផ្សារសំបូរបន្លែឬអត់ និងងាយស្រួលដោយមានឈ្នួញកណ្តាលមកទទួលទិញដល់កន្លែងតែម្តង។
គូសបញ្ជាក់ផងដែរថា អ្នកភូមិកំពុងសំណាញ់ ឃុំមៀន បើទោះបីតំបន់នេះទទួលរងគ្រោះដោយទឹកជំនន់ក៍ដោយ តែអាជ្ញាធរយកចិត្តទុកដាក់នូវសុខទុក្ខរបស់អ្នកភូមិនេះជានិច្ច ខណៈបច្ចប្បន្នមានផ្លូវងាយស្រួលធ្វើដំណើរ និងមានបណ្តាញភ្លើងផ្គត់ផ្គង់ពេញភូមិតែម្តង៕