លោក Shih Sung Pang អគ្គនាយកក្រុមហ៊ុនរោងចក្រ សាន់ស៊ូ បានមានប្រសាសន៍ថា ខោអាវក្មេងៗដែលបានឧបត្ថម្ភដល់រដ្ឋបាលខេត្តនាឱកាសនេះ គឺជាការរួមចំណែកមួយផ្នែកជាមួយរដ្ឋបាលខេត្ត ដែលកំពុងប្រយុទ្ធយ៉ាងសកម្មជាមួយនឹងវីរុស កូវីដ-១៩។ រីឯលើផ្នែកសង្វាក់ផលិតកម្មលោកនាយកក្រុមហ៊ុនរោងចក្របានបញ្ជាក់ថា រោងចក្ររបស់លោកនៅតែបន្តការផលិតជាធម្មត្តា ដោយរោងចក្រមានវត្ថុធាតុដើមគ្រប់គ្រាន់ និងធានាបានដល់ការផលិត ដោយរោងចក្រកំពុងប្រើប្រាស់កម្មករសរុបប្រមាណ ៤,០០០ នាក់។
ចំពោះបញ្ហាសុខភាពរបស់បងប្អូន កម្មករ កម្មការីនី រៀងរាល់ចេញ ចូលធ្វើការងារដោយឆ្លងកាត់ការត្រួតពិនិត្យជាប្រចាំ ស្រមតាមការណែនាំរបស់រាជរដ្ឋាភិបាល និងការណែនាំរបស់ក្រសួងសុខាភិបាល ដោយប្រើប្រាស់ម៉ាស៊ីស្គែន និងត្រួត ពិនិត្យកម្តៅ។ឆ្លើយតបជាមួយ អគ្គនាយកក្រុមហ៊ុន រោងចក្រ និងបងប្អូន កម្មករ កម្មការីនី នាឱកាសនោះ ឯកឧត្តម អ៊ុន ចាន់ដា ប្រធានគណៈកម្មការប្រយុទ្ធវីរុស កូវីដ-១៩ និងជាអភិបាល នៃគណៈអភិបាលខេត្តកំពង់ចាម ថ្លែងអំណរគុណដល់លោក Shih Sung Pang អគ្គនាយកក្រុមហ៊ុន រោងចក្រ ដែលបានផ្តល់នូវសំលៀកបំពាក់ដល់រដ្ឋបាលខេត្តនាឱកាសនេះ ស្របពេលដែលរដ្ឋបាលខេត្ត រដ្ឋបាលក្រុង/ស្រុក ឃុំ/សង្កាត់ កំពុងយុទ្ធនាការ អប់រំសុខភាពតាមមូលដ្ឋាន ក្នុងនាមក្រុមប្រឹក្សាខេត្ត អាជ្ញាធរខេត្តនិងក្នុងនាមខ្លួនខ្ញុំផ្ទាល់ ខ្ញុំនឹងចាត់ចែងនូវសំលៀកបំពាក់ទាំងនេះចែកជូនបងប្អូនដែលជួបការលំបាកដោយផ្ទាល់ដល់មូលដ្ឋាន។
ឯកឧត្តម អភិបាលខេត្ត បានផ្តាំផ្ញើដល់លោកនាយកក្រុមហ៊ុន រោងចក្រធ្វើយ៉ាងណាត្រូវត្រួត ពិនិត្យជាប្រចាំលើបញ្ហាសុខភាពរបស់បងប្អូន កម្មករ កម្មការីនីយើង គឺមានសារៈសំខាន់ណាស់ កាលបើសុខភាពល្អការផលិតនឹងទទួលបានតាមការបញ្ជាទិញផងដែរ។ ចំពោះបងប្អូន កម្មករ កម្មការីនី ទាំងអស់ត្រូវគិតគូពីសុខភាពផ្ទាល់ខ្លួនជាចំបង នោះគឺ រស់នៅស្អាត ផឹកស្អាត និងដេកស្អាត ប្រសិនបើមានបញ្ហាលើផ្នែកសុខភាពត្រូវទៅកាន់មណ្ឌល សុខភាព ឬមន្ទីរពេទ្យដែលនៅជិតបងប្អូនបំផុត។
ដើម្បីខ្លួនអ្នក ក្រុមគ្រួសាររបស់អ្នក និងសហគមន៍របស់អ្នក គ្មានកូវីដ១៩៕