ក្នុងសម័យកាលដ៏រុងរឿងនោះ លោកព្រឹទ្ធចារ្យដែលមានតិចនិចលេងបាល់ល្អ និងពូកែបត់បែននៅលើសមរភូមិវាលស្មៅបានយ៉ាងស្ទាត់ជំនាញ ត្រូវបានគេប្រសិទ្ធនាមឲ្យថា «ពស់កេងកង»។ មិនត្រឹមតែប៉ុណ្ណោះ លោកក៏ជាសមាជិកម្នាក់ ដែលបានជួយឲ្យក្រុមបាល់ទាត់ជម្រើសជាតិកម្ពុជាទទួលបានចំណាត់ថ្នាក់លេខ ៤នៃពានរង្វាន់ទ្វីបអាស៊ី Asian Cup កាលពីឆ្នាំ១៩៧២។ សព្វថ្ងៃលោក គឺគ្រូបង្វឹកក្រុមយុវជនរបស់ក្លឹបមួយនៅប្រទេសថៃ មានឈ្មោះថាសាលាបាល់ទាត់ Thai Kid Soccer ដោយមានកីឡាករអាយុ ចន្លោះពី ១១ឆ្នាំដល់១៨ឆ្នាំ ។
ក្រៅពីបង្ហាត់ក្រុមកីឡាករក្រៅស្រុកហើយ លោកព្រឹទ្ធាចារ្យ វ័យ ៧១ ឆ្នាំ ក៏តែងតែឆ្លៀតពេល ចែករំលែកបទពិសោធន៍ ផ្ដល់ជាអនុសាសន៍ និងគន្លឹះល្អៗជាច្រើនទៀតដល់ក្រុមកីឡាករជម្រើសជាតិកម្ពុជា ទាំងឈុតតូច និងឈុតធំផងដែរ។ សូមបញ្ជាក់ថា លោកព្រឹទ្ធចារ្យតែងតែផ្ដល់បទសម្ភាសន៍ជាមួយនឹងអ្នកសារព័ត៌មានពីបំណងប្រាថ្នាដ៏ធំបំផុតក្នុងជីវិតរបស់លោក គឺលោកចង់ឃើញបាល់ទាត់កម្ពុជាបច្ចុប្បន្នរីកចម្រើនអោយខ្លាំងបន្ថែមទៀត៕
