ត្រឡប់មកពីលេងកន្លែងធ្វើការប្តីត្រឡប់មកផ្ទះដល់ពាក់កណ្តាលផ្លូវរថយន្តកិនស្លាប់ចោលកូនប្រុសស្រី២នាក់

ភ្នំពេញ៖ស្ត្រីម្នាក់បានស្លាប់ចោលកូនឲ្យនៅកំព្រាចំនួន២នាក់យ៉ាងកណ្តោចកន្តែងខណៈជិះម៉ូតូមួយគ្រឿងទើបត្រឡប់មកពីសួរសុខទុក្ខប្តីនៅកន្លែងធ្វើការនៅឯកំបូលត្រូវរថយន្តបើកបុកនិងកិនបណ្តាលឲ្យស្លាប់យ៉ាងអាណោចអាធម៌នៅលើផ្លូវ។

ហេតុការណ៍នេះបានកើតឡើងកាលពីវេលាម៉ោង០៦នឹង៣៥នាទីយប់ថ្ងៃទី០៩ខែមិនាឆ្នាំ២០២០តាមបណ្តោយផ្លូវមហាវិថីឈ្នះឈ្នះនៅចំណុចក្បែរនឹងស្ថានីយ៍ទូរទស្សន៍PNNស្ថិតនៅក្នុងសង្កាត់បាក់ខែងខណ្ឌជ្រោយចង្វារ។ជនរងគ្រោះដែលស្លាប់មានឈ្មោះ ប៉ោ ចន្ថា ភេទស្រី អាយុ៤១ឆ្នាំស្នាក់នៅភូមិភ្នំដិលឃុំតាំងក្រាំងស្រុកបាធាយ ខេត្តកំពង់ចាម។

តាមប្រភពនៅកន្លែងកើតហេតុបានឲ្យដឹងថា នៅមុនពេលកើតហេតុគឺស្ត្រីរងគ្រោះបានជិះម៉ូតូមួយគ្រឿងម៉ាកZoomerXពណ៌ខៀវពាក់ស្លាកលេខភ្នំពេញ1FB-8106បើកបរតាមបណ្តោយផ្លូវមហាវិថីឈ្នះឈ្នះក្នុងទិសដៅពីលិចទៅកើតបំណងត្រឡប់ទៅផ្ទះដោយមានទិញរបស់របរផ្ញើរកូននៅឯផ្ទះផងតែជាអកុសលត្រូវរថយន្តមិនចាំម៉ាកបុកនិងកិនបណ្តាលឲ្យស្លាប់តែម្តង ក្រោយបង្កហេតុរួចដោយសភាពផ្លូវងងឹតនិងស្ងាត់ផងនោះរថយន្តបង្កបានបើកគេចខ្លួនបាត់ស្រមោលតែម្តង។

ប្រភពដដែលបានបន្តថាក្រោយមានគ្រោះថ្នាក់បណ្តាលឲ្យមានមនុស្សស្លាប់រួចមក ស្រាប់តែមានជនខិលខូចមកលួចដោះយកគ្រឿងអល័ង្កាពីខ្លួនជនរងគ្រោះអស់ថែមទៀត។តាមសំដីសាច់ញាតិបានប្រាប់ថាជនរងគ្រោះទើបត្រឡប់មកពីលេងនៅកន្លែងធ្វើការប្តីនៅឯកំបូលពេលត្រឡប់មកផ្ទះវិញទើបជួបគ្រោះថ្នាក់បែបនេះ។ ក្រោយពេលកើតហេតុខាងលើនេះសពជនរងគ្រោះត្រូវបានសមត្ថកិច្ចប្រគល់ទៅអោយសាច់ញ្ញាតិដើម្បីយកទៅធ្វើបុណ្យទៅតាមប្រពៃណីព្រះពុទ្ធសាសនានៅឯស្រុកកំណើត៕