បើតាមប្រភពព័ត៌មានពីលោក ជា ណាត បានរៀបរាប់ឱ្យដឹងថា លោកបានប្តូរទីតាំងផ្ទះរបស់ខ្លួន ដែលធ្លាប់រស់នៅក្នុងភូមិប៉ាហ៊ីត្បូង សង្កាត់ប៉ៃលិន ក្រុងប៉ៃលិន ទៅសាងសង់ផ្ទះនៅកន្លែងផ្សេងត្រង់ចំណុចកើតហេតុខាងលើ ។ លោកបន្តទៀតថា ផ្ទះថ្មីនេះ មិនទាន់សាងសង់រួចរាល់នៅឡើយទេ ដោយមានតែទ្វារខាងមុខសម្រាប់បិទផ្ទប់បណ្តោះអាសន្នប៉ុណ្ណោះ ។ ចំណែកទ្វារខាងក្រោយ គឺនៅចំហរ លុះដល់វេលាម៉ោង៣ទាបភ្លឺ បន្ទាប់ពីគាត់ ងើបបត់ជើងតូចរួច ក៏ឡើងទៅលើគ្រែដេកសម្ងំវិញ អត់ទាន់លង់លក់នៅឡើយទេ ។ ពេលនោះ ស្រាប់តែឃើញមានយុវជនម្នាក់ ដើរចុះឡើងៗ ក្បែរកន្លែងលោកដេក ដោយស្មានថា ជាមិត្តភក្តិកូនរបស់ខ្លួន ក៏ចាំមើលបន្តទៀត លុះដឹងថាជាចោរ ក៏ស្ទុះចេញពីមុង ដើម្បីសង្គ្រប់ចាប់ ។ តែពេលចោរនោះឃើញ ក៏ឱនខ្លួន រួចស្ទុះចេញទៅក្រៅ ហើយលោកក៏រត់ដេញតាមពីក្រោយ និងស្រែកឱ្យប្រជាពលរដ្ឋក្នុងភូមិជួយដេញតាមដែរ ។ ប៉ុន្តែ ដោយសារខ្លួនរត់ដេញអត់ស្បែកជើង ហើយឈឺជើង ក៏ឈប់ដេញតាម រួចប្តឹងនគរបាលឱ្យចុះទៅត្រួតពិនិត្យទាំងយប់ទាបភ្លឺតែម្តង ។ លោកបន្តទៀតថា ពេលនេះ កំពុងដាក់ពាក្យបណ្តឹងនៅប៉ុស្តិ៍នគរបាលប៉ៃលិន ដើម្បីឱ្យស្រាវជ្រាវចាប់ជនសង្ស័យយកមកផ្តន្ទាទោសតាមផ្លូវច្បាប់ ចំណែកម៉ូតូ ប្រគល់ឱ្យនគរបាលប៉ុស្តិ៍រក្សាទុក ៕
