ខេត្តស្វាយរៀង៖ ព្រឹកថ្ងៃសុក្រ ទី០៧ ខែកុម្ភៈ ឆ្នាំ២០២០ នេះលោកឧត្តមសេនីយ៍ត្រី សែ វុទ្ធី មេបញ្ជាការកងរាជអាវុធហត្ថខេត្តស្វារៀង តំណាងដ៏ខ្ពង់ខ្ពស់លោក នាយឧត្តមសេនីយ៍ សៅ សុខា អគ្គមេបញ្ជាការរង កងយោធពលខេមរភូមិន្ទ និងជាមេបញ្ជាការកងរាជអាវុធហត្ថលេីផ្ទៃប្រទេស បានអញ្ជេីញចូលរួមក្នុងពិធីបញ្ចុះបឋមសិលា ឧប្បឋានសាលា នៅវត្តអង្គស្វាយ (ហៅវត្តស្វាយរំពារ) ស្ថិតនៅភូមិអង្រ្គង ឃុំស្វាយរំពារ ស្រុកស្វាយទាប ខេត្តស្វាយរៀង ដែលមានប្រវែង ៣០ម៉ែត្រx១៨ម៉ែត្រ គ្រោងចំណាយថវិកាសរុប ១,១២៧,៥០០,០០០រៀល (មួយពាន់មួយរយម្ភៃប្រាំពីរលានប្រាំសែនរៀល) និងត្រូវចំណាយពេលសាងសង់រួចរាល់រយៈពេល ១២ខែ បន្ទាបពីថ្ងៃបញ្ចុះបឋមសិលាសាងសង់នេះ។
ពិធីនេះក៏មានអញ្ជើញចូលរួមពីសំណាក់ អស់លោក លោកស្រី មេបញ្ជាការរង លោកនាយរងសេនាធិការដ្ឋាន លោកអនុប្រធានមន្ទីរ លោក លោកស្រីនាយការិយាល័យ លោកមេបញ្ជាការមូលដ្ឋានកងរាជអាវុធហត្ថស្រុក-ក្រុងទាំង៨ និងប្រជាពលរដ្ឋជាច្រេីនរូបទៀត។
ក្នុងពិធីនេះដែរលោកឧត្តមសេនីយ៍ត្រីមេបញ្ជាការ ក៏បានចែកអំណោយជូនប្រជាពលរដ្ឋនូវ ក្រណាត់ស ១ដុំ និងថវិកា ២០,០០០៛ (ពីរម៉ឺនរៀល)។
លោកឧត្តមសេនីយ៍បានមានប្រសាសន៍ថា៖ ក្នុងនាមខ្ញុំផ្ទាល់មានក្ដីសោមនស្សរីករាយក្រៃលែងបានចូលរួមក្នុងពិធីបញ្ចុះបឋមសិលា ឧប្បឋានសាលាវត្តអង្គស្វាយ (ហៅវត្តស្វាយរំពារ) ស្ថិតនៅភូមិអង្រ្គង ឃុំស្វាយរំពារ ស្រុកស្វាយទាប ខេត្តស្វាយរៀង នាថ្ងៃនេះអ្វីដែលគួរកត់សម្គាល់បន្ទាប់ពីបានស្ដាប់របាយការណ៍របស់ លោកអភិបាលស្រុកដែលបានបញ្ជាក់ភាពរីកចំរេីនលេីវិស័យព្រះពុទ្ធសាសនា បន្ទាប់ពីប្រទេសជាតិយេីងទទួលបាននូវសុខសន្តិភាពពេញលេញ តាមរយៈនយោបាយឈ្នះ ឈ្នះ របស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ។
ឆ្លៀតក្នុងឱកាសនេះ លោកឧត្តមសេនីយ៍ត្រី ក៏បានកោតសរសេីរដល់ព្រះចៅអធិការ គណ:កម្មការពុទ្ធបរិសាទ និងសប្បុរសជនទាំងអស់ ដែលបានរួមចំណែកក្នុងការអភិវឌ្ឍ នូវសមិទ្ធផលនានាឱ្យមានការរីកចំរេីនគួរឱ្យមានមោទនភាពនូវសមិទ្ធនានាកន្លងមក រួមទាំងការកសាងឧប្បឋានសាលាបន្ថែមទៀតនាពេលនេះ ដែលមានការផ្តួចផ្ដេីមពី ឯកឧត្ដម សៅ សុខា សមាជិកអចិន្ត្រៃយ៍ គណកម្មាធិការកណ្ដាលគណបក្សប្រជាជនកម្ពុជា និងលោកជំទាវ។
ឧបត្ថម្ភសាងសង់ដោយ ឧបាសក សាំង និងឧបាសិកា សុវណ្ណ ជាឪពុកបង្កេីតរបស់ឯកឧត្តម សៅ សុខា។ សាជាថ្មីម្ដងទៀត លោកឧត្តមសេនីយ៍ត្រី អំពាវនាវដល់លោកយាយ លោកតា ពុកម៉ែ បងប្អូនទាំងអស់ត្រូវចូលរួមចំណែកអភិវឌ្ឍសង្គមជាតិ ចូលរួមអនុវត្តគោនយោបាយភូមិឃុំមានសុវត្តិភាព ពង្រឹងសន្តិសុខ នៅក្នុងមូលដ្ឋានរបស់យេីង ជាពិសេសត្រូវអប់រំបងប្អូន កូនចៅរបស់ខ្លួន ត្រូវជៀសឱ្យឆ្ងាយពីគ្រឿងញៀន ដែលនាំឱ្យមានផលប៉ះពាល់ដល់ខ្លួនឯងផ្ទាល់ និងសង្គមជាតិ។
ទន្ទឹមនឹងនេះយេីងទាំងអស់គ្នាត្រូវចូលរួមគោរពច្បាប់ចរាចរណ៍ផ្លូវគោកដេីម្បីរក្សាអាយុជីវិត និងទ្រព្យសម្បត្តិខ្លួនឯងផង និងចូលរួមរក្សាសណ្ដាប់ធ្នាប់សង្គមផង។ មុននឹងបញ្ចប់ លោកឧត្តមសេនីយ៍ត្រី បានថ្លែងអំណរគុណដល់ លោកយាយ លោកតា ព្រមទាំងលោក លោកស្រី ទាំងអស់ដែលបានអញ្ជេីញចូលរួមក្នុងពិធីនាពេលនេះ អង្គពិធីទាំងមូលសូមទទួលបាននូវពុទ្ធពរទាំងបួនប្រការគឺ អាយុ វណ្ណៈ សុឃៈ ពលៈ កុំបីឃ្លៀងឃ្លាតឡេីយ ៕