បន្ទាប់ពីលោក សរ វណ្ណា នាយកសាខា អាននូវសេចក្តីសម្រេចទទួលស្គាល់សមាស ភាពគណៈកិត្តិយស គណៈកម្មាធិការអនុសាខាក្រុង រួចមកលោក ស៊ូ ម៉ុល ប្រធានកិត្តយសអនុសាខាស្រុករមាសហែក និងលោក សុ ខារ៉ាម ប្រធានគណៈកម្មាធិការអនុសាខាស្រុករំដួល មានចំណាប់អារម្មណ៍ និងបានផ្តាំផ្ញើដល់លោក លោកស្រីទាំងអស់ដែលទើបតែប្រកាសទទួលស្គាល់ថ្មី ត្រូវខិតខំប្រឹងប្រែងលើការងារមនុស្សធម៌ ដើម្បីផលប្រយោជន៍ក្នុងការជួយសង្គ្រោះដល់ប្រជាពលរដ្ឋដែលងាយរងគ្រោះ និងរងគ្រោះដោយសារគ្រោះមហន្តរាយផ្សេងៗ ។
មានប្រសាសន៍សំណេះសំណាលក្នុងពិធីនោះ លោកជំទាវ ពៅ សុភាព ហេរញ្ញឹកគណៈកម្មាធិការសាខា តំណាង ឯកឧត្តម ម៉ែន វិបុល ប្រធានគណៈកម្មាធិការសាខាបានសម្តែងនូវមនោសញ្ចេតនាដ៍កក់ក្តៅចំពោះ លោក លោកស្រី នៅក្នុងក្រុមប្រឹក្សា និងគណៈអភិបាលស្រុក ស្ថាប័ននានាជុំវិញស្រុក ព្រះសង្ឃ អាជីវករ និងក្រុមប្រឹក្សាសង្កាត់ មានឆន្ទៈចូលរួមចែករំលែកពេលវេលាបំរើក្នុងបុព្វហេតុមនុស្សធម៌ដោយស្ម័គ្រចិត្ត នេះជាកម្លាំងមនុស្សធម៌នៅថ្នាក់មូលដ្ឋានដើម្បីជាសេនាធិការ ឱ្យសាខា និងអាជ្ញាធរគ្រប់លំដាប់ថ្នាក់នៅមូលដ្ឋាន ។
លោកជំទាវបានបន្តទៀតថា តម្លៃមនុស្សធម៌របស់កាកបាទក្រហមកម្ពុជាគឺស្ថិតនៅត្រង់យើងទាំងអស់គ្នាមានឆន្ទៈជួយអ្នកដែលងាយរងគ្រោះ និងរងគ្រោះដោយគ្រោះមហន្តរាយផ្សេងៗឲ្យបានទាន់ពេលវេលាមានប្រសិទ្ធិភាព និងមានតម្លាភាពរួមទាំងប្រកាន់ខ្ជាប់នូវគោលការណ៍គ្រឹះទាំង ៧ របស់កាកបាទក្រហមកម្ពុជាផងដែរ ។ បន្ទាប់ពីប្រកាសតាំងរួចសមាជិក សមាជិការទាំងអស់បានបន្តចូលរួមទទួលវគ្គយល់ដឹងជាមូលដ្ឋាន ស្តីពីចលនាកាកបាទក្រហម អឌ្ឍចន្ទក្រហម និងកាកបាទក្រហមកម្ពុជា ។
