អភិបាលក្រុងកំពង់ឆ្នាំង លោក យិន សាវ៉េន កាលពីរសៀលថ្ងៃទៅ២៨ ខែមករា ឆ្នាំ២០២០ បានប្រាប់ភ្នាក់ងារយើងតាមទូរស័ព្ទថា រដ្ឋបាលសាលាក្រុងកំពង់ឆ្នាំង បានជូនដំណឹងដល់អ្នករស់នៅលើផ្ទះល្វែងដែលមានអាយុកាលដ៍ចំណាស់នេះហើយ ប៉ុន្តែបើប្រជាពលរដ្ឋមិនព្រមចេញ លោកមិនដឹងធ្វើម៉េចដែរ បើមានគ្រោះថ្នាក់សូមកុំបន្ទោសអាជ្ញាធរ ព្រោះអាជ្ញាធរបានជូនដំណឹងដល់ពួកគាត់ច្រើនលើកច្រើនសារមកហើយ ។ យ៉ាងនេះក្តីតាមរយៈប្រពន្ឋ័ផ្សព្វផ្សាយ លោកនៅតែអំពាវនាវជាថ្មី ដល់ប្រជាពលរដ្ឋកំពុងស្នាក់នៅក្នុងអាគារខាងលើនេះ សូមមេត្តាចាកចេញ រកកន្លែងស្នាក់នៅបណ្តោះអាសន្ន ហើយសហការគ្នា វាយអាគារចាស់ ធ្វើអាគារថ្មីជាកម្មសិទ្ឋផ្ទាល់ខ្លួនចុះ ព្រោះក្នុងចំណោមផ្ទះទាំង១៣ល្វែង មានមួយភាគជាអាគាររបស់រដ្ឋ ដែលអាជ្ញាធរខេត្តទើបសុំកាត់ចេញពីបញ្ជីសារពើភ័ណ្ឌរួចហើយដែរ ដើម្បីប្រគល់ជូនអ្នកដែលបានកាន់កាប់ តាំងពីដើមមក ។ គួររំលឹកដែរថាអាគារផ្ទះល្វែង១៣ល្វែងខាងលើនេះគឺកសាងសម័យអាណានិគមនិយមបារាំងក្នុងឆ្នាំ ១៩៣១ មកដល់ពេលនេះមានអាយុកាល ៨៩ឆ្នាំហើយកំពុងមានសភាពទ្រុឌទ្រោមជាខ្លាំង៕
