ទាំងយុវជនទាំងប្រជាជនមន្ត្រីរាជការ និងថ្នាក់ដឹកនាំទូទាំងខេត្តសង្ឃឹមយ៉ាងមុតមាំថាខេត្តកំពង់ស្ពឺមិនយូរប៉ុន្មានទៀតទេនឹងទទួលបានសមិទ្ធផលថ្មីបន្ថែមទៀតក្រៅស្ពានអាកាសឆ្លងជាតិផ្លូវជាតិលេខ៤ ស្ពានឆ្លងស្ទឹង បណ្ណាល័យ ពុះទ្រូងផ្លូវ ធ្វើសួន ធ្វើផ្លូវ ជាដើម ។ល។
ឯកឧត្តម ហ៊ុន ម៉ានី ប្រធានគណៈកម្មការទី៨នៃរដ្ឋសភា និងជាតំណាងរាស្រ្តមណ្ឌលកំពង់ស្ពឺ បានអញ្ជើញចូលរួមក្នុងពិធីក្រុងពាលី បញ្ចុះខណ្ឌសីមា បើកការដ្ឋានសាងសង់កីឡដ្ឋាននៅខេត្តកំពង់ស្ពឺ ដោយមានវត្តមានឯកឧត្តមអ្នកតំណាងរាស្រ្តមណ្ឌលកំពង់ស្ពឺ ឯកឧត្តមអភិបាលខេត្ត និងដៃគូឯកជនជាអ្នកចូលរួមឧបត្ថមក្នុងគម្រោងសាងសង់នេះ។
ការសាងសង់កីឡដ្ឋាន គឺជាការចូលរួមយ៉ាងសំខាន់ក្នុងការលើកកម្ពស់វិស័យកីឡាក្នុងខេត្តផ្ទាល់។ ឯកឧត្តម ហ៊ុន ម៉ានី បានមានប្រសាសន៍លើកឡើងថា៖ «កីឡដ្ឋាននេះ នឹងក្លាយជាមជ្ឈមណ្ឌលកីឡា ដែលប្រកបដោយវិជ្ជាជីវៈ និងមានគុណភាព សម្រាប់ប្រជាពលរដ្ឋកំពង់ស្ពឺ ជាពិសេសយុវជនដែលស្រឡាញ់វិស័យកីឡាបាល់ទាត់។»
ទន្ទឹមនឹងនេះ ឯកឧត្តមបានបន្តថា វិស័យកីឡា បាន និងកំពុងលើកមុខមាត់ជាតិកម្ពុជាលើឆាកអន្តរជាតិប្រកបដោយមោទនភាព ហើយក្នុងនោះឯកឧត្តមមានការរំពឹងជឿជាក់ថា កីឡដ្ឋានថ្មីក្នុងខេត្តកំពង់ស្ពឺនេះ នឹងលើកមុខមាត់ខេត្តកំពង់ស្ពឺ តាមរយៈការចូលរួមបង្កើតកីឡាករជម្រើសជាតិ និងកីឡាករឆ្នើមដែលចេញពីខេត្តផ្ទាល់៕
