ថ្នាក់ដឹកនាំខេត្តសៀមរាប លើកឡើងថា ៖ យើងទាំងអស់គ្នាមិនគួរប្រើកែវភ្នែក សម្លឹងឃើញតែភាពពិការនៃជនមានពិការភាពនោះទេ តែត្រូវសម្លឹងគិតដោយវិចារណញ្ញាណ ទៅលើសមត្ថភាពដែលមានរបស់ជនមានពិការភាព ហើយយើងក៏គួរតែផ្តល់តម្លៃជូនចំពោះជនមានពិការភាព ប្រសើរជាងការផ្តល់ត្រឹមតែសេចក្តីអាណិត។
កុ្នងរបាយការណ៍របស់លោក អោ ម៉ៅ ប្រធានមន្ទីរសង្គមកិច្ច អតីតយុទ្ធជន និងយុវនីតិសម្បទាខេត្តសៀមរាប បានបង្ហាញថា ៖ ទន្ន័យគិតត្រឹមឆ្នាំ២០១៩នេះ ជនមានពិការភាពនៅខេត្តសៀមរាប មានចំនួនសរុបប្រមាណជាជាង៧ពាន់នាក់ ក្នុងនោះជនមានពិការភាព ដែលកំពុងបានទទួលរបបគោលនយោបាយពីរាជរដ្ឋាភិបាលជិត ៦ពាន់នាក់ ។ លោកប្រធានមន្ទីរ បានបង្ហាញរបាយការណ៍នេះ នាព្រឹកថ្ងៃទី១៩ ខែធ្នូ ឆ្នាំ២០១៩ ក្នុងឱកាសនៃការជួបជុំជាមួយជនមានពិការភាព និងអ្នកពាក់ព័ន្ធ ប្រមាណជាង២០០នាក់ ក្នុងឱកាសប្រារព្ធខួបលើកទី២១ ទិវាជនមានពិការភាពកម្ពុជា នឹង ខួបលើកទី៣៧ នៃទិវាជនមានពិការភាពអន្តរជាតិ ( ៣ធ្នូ ) ក្រោមប្រធានបទ ” លុបបំបាត់ឧបសគ្គរារាំងជនមានពិការភាព ដើម្បីសង្គមមួយប្រកបដោយបរិយាបន្ន ” ។ ក្នុងរបាយការណ៍ដដែលនោះបានបញ្ជាក់ថា ជនមានពិការភាពនៅខេត្តសៀមរាប ត្រូវបានទទួលការផ្តល់សេវាស្តារលទ្ធភាពពលកម្ម កាយសម្បទា ដោយឥតគិតថ្លៃ ដូចជាការបំពាក់ជើងសិប្បនិម្មិត បំពាក់ដៃសិប្បនិម្មិត បំពាក់រណបជើង ផ្តល់ឈើជ្រែងឃ្លៀក រទេះរុញ ជាមួយនោះអ្នកជំងឺជាជនមានពិការភាព បានទទួលការព្យាបាលដោយចលនាផងដែរ ។ ក្នុងឆ្នាំ២០១៩នេះដែរ នៅតាមសហគមន៍នានាក្នុងស្រុកប្រាសាទបាគង ជនមានពិការភាព ជិត ១ ០០០គ្រួសារ ទទួលបានរបបគោលនយោបាយជនពិការក្រីក្រ ពីរាជរដ្ឋាភិបាល ។
ឯកឧត្តម ទេស ច័ន្ទគិរី សមាជិកក្រុមប្រឹក្សាខេត្ត សៀមរាប លើកឡើងថា យើងទាំងអស់គ្នាមិនគួរប្រើកែវភ្នែក សម្លឹងឃើញតែភាពពិការនៃជនមានពិការភាពនោះទេ តែត្រូវសម្លឹងគិតដោយវិចារណញ្ញាណ ទៅលើសមត្ថភាពនៃជនមានពិការភាព ហើយយើងក៏គួរតែផ្តល់តម្លៃជូនចំពោះជនមានពិការភាព ជាជាងផ្តល់ឲ្យតឹមតែសេចក្តីអាណិត ។ ឯកឧត្តមបញ្ជាក់ថា បើយោងតាមខ្លឹមសារ នៃសារលិខិតសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី ប្រធានកិត្តិយសក្រុមប្រឹក្សាសកម្មភាពជនពិការ នៅក្នុងអង្គសន្និបាតបូកសរុប ការអនុវត្តផែនការយុទ្ធសាស្ត្រជាតិស្តីពីពិការភាព ឆ្នាំ២០១៤-២០១៨ និង ប្រកាសដាក់ឲ្យប្រើប្រាស់ជាផ្លូវការ ផែនការយុទ្ធសាស្ត្រជាតិស្តីពីពិការភាព ២០១៩-២០២៣ បានបង្ហាញថា រាជរដ្ឋាភិបាលកម្ពុជាបានចំណាយថវិការដ្ឋយ៉ាងច្រើនសន្ធឹកសន្ធាប់ ដើម្បីលើកស្ទួយវិស័យពិការភាពកម្ពុជា សំដៅជួយដល់ជនមានពិការភាព និងក្រុមគ្រួសារឲ្យទទួលបានគុណភាពជីវិតល្អប្រសើរ គ្មានការរើសអើង ទទួលបានសេវាសង្គម និងសេវាសាធារណៈប្រកបដោយគុណភាព និងបានចូលរួមគ្រប់សកម្មភាពសង្គម ព្រមទាំងការគិតគូរដាក់បញ្ចូលការងារពិការភាពទៅក្នុងគ្រប់វិស័យ តាមរយៈការកែសម្រួល និងរៀបចំលិខិតបទដ្ឋានគតិយុត្ត ផ្សព្វផ្សាយការយល់ដឹងអំពីវិស័យពិការភាពទាំងថ្នាក់នៅជាតិនិងថ្នាក់ក្រោមជាតិ វិស័យឯកជន សង្គមស៊ីវិល និងដៃគូអភិវឌ្ឍនានា ដើម្បីគាំទ្រដល់ការអភិវឌ្ឍ ប្រកបដោយចីរភាពសម្រាប់ជនមានពិការភាពគ្រប់រូបនៅកម្ពុជា ។ ទាំងនេះ គឺជាការប្តេជ្ញាចិត្តប្រកបដោយសុឆន្ទៈ របស់រាជរដ្ឋាភិបាលកម្ពុជា ក្នុងការរុះរើរបាំងឧបស័គ្គនានា ដើម្បីបង្កើនឱកាសដល់ជនមានពិការភាព ៕
